خزائن العرفان
سُوۡرَةُ المنَافِقون
اللہ کے نام سے شروع جو نہایت مہربان رحم والا(ف ۱)
۱ سورۂ منافقون مدنیّہ ہے، اس میں دو۲ رکوع،گیارہ ۱۱ آیتیں، ایک سو اسّی۱۸۰ کلمے اور نو سو چھہتّر ۹۷۶ حرف ہیں۔
(۱) جب منافق تمہارے حضور حاضر ہوتے ہیں (ف ۲) کہتے ہیں کہ ہم گواہی دیتے ہیں کہ حضور بیشک یقیناً اللہ کے رسول ہیں اور اللہ جانتا ہے کہ تم اس کے رسول ہو، اور اللہ گواہی دیتا ہے کہ منافق ضرور جھوٹے ہیں (ف ۳)
۲ تو اپنے ضمیر کے خلاف۔
۳ ان کا باطن ظاہر کے موافق نہیں، جو کہتے ہیں اس کے خلاف اعتقاد رکھتے ہیں۔
(۲) اور انہوں نے اپنی قسموں کو ڈھال ٹھہرا لیا (ف ۴) تو اللہ کی راہ سے روکا (ف ۵) بیشک وہ بہت ہی برے کام کرتے ہیں (ف ۶)
۴ کہ ان کے ذریعہ سے قتل و قید سے محفوظ رہیں۔
۵ لوگوں کو، یعنی جہاد سے یا سیّدِ عالَم صلی اللہ علیہ و آلہٖ و سلم پر ایمان لانے سے طرح طرح کے وسوسے اور شبہے ڈال کر۔
۶ کہ بمقابلہ ایمان کے کفر اختیار کرتے ہیں۔
(۳) یہ اس لیے کہ وہ زبان سے ایمان لائے پھر دل سے کافر ہوئے تو ان کے دلوں پر مہر کر دی گئی تو اب وہ کچھ نہیں سمجھتے۔
(۴) اور جب تو انہیں دیکھے (ف ۷) ان کے جسم تجھے بھلے معلوم ہوں، اور اگر بات کریں تو تُو ان کی بات غور سے سنے (ف ۸) گویا وہ کڑیاں ہیں دیوار سے ٹکائی ہوئی (ف ۹) ہر بلند آواز اپنے ہی اوپر لے جاتے ہیں (ف ۱۰) وہ دشمن ہیں (ف ۱۱) تو ان سے بچتے رہو (ف ۱۲) اللہ انہیں مارے کہاں اوندھے جاتے ہیں (ف ۱۳)
۷ یعنی منافقین کو مثل عبداللہ بن اُبی ابنِ سلول وغیرہ کے۔
۸ ابنِ اُبَی جسیم، صبیح، خوبرو، و خوش بیان آدمی تھا اور اس کے ساتھ والے منافقین قریب قریب ویسے ہی تھے، نبی کریم صلی اللہ علیہ و آلہٖ و سلم کی مجلس شریف میں جب یہ لوگ حاضر ہوتے تو خوب باتیں بناتے جو سننے والے کو اچھی معلوم ہوتیں۔
۹ جن میں بے جان تصویر کی طرح نہ ایمان کی روح، نہ انجام سوچنے والی عقل۔
۱۰ کوئی کسی کو پکارتا ہو، یا اپنی گُمی چیز ڈھونڈھتا ہو، یا لشکر میں کسی مقصد کے لئے کوئی بات بلند آواز سے کہیں تو یہ اپنے خبثِ نفس اور سوئے ظن سے یہی سمجھتے ہیں کہ انہیں کچھ کہا گیا اور انہیں یہ اندیشہ رہتا ہے کہ ان کے حق میں کوئی ایسا مضمون نازل ہوا جس سے ان کے راز فاش ہو جائیں۔
۱۱ دل میں شدید عداوت رکھتے ہیں اور کفّار کے پاس یہاں کی خبریں پہنچاتے ہیں، ان کے جاسوس ہیں۔
۱۲ اور ان کے ظاہِر حال سے دھوکا نہ کھاؤ۔
۱۳ اور روشن برہانیں قائم ہونے کے باوجود حق سے منحرف ہوتے ہیں۔
(۵) اور جب ان سے کہا جائے کہ آؤ (ف ۱۴) رسول اللہ تمہارے لیے معافی چاہیں تو اپنے سر گھماتے ہیں اور تم انہیں دیکھو کہ غور کرتے ہوئے منہ پھیر لیتے ہیں (ف ۱۵)
۱۴ معافی چاہنے کے لئے۔
۱۵ شانِ نزول : غزوۂ مریسیع سے فارغ ہو کر جب نبی کریم صلی اللہ علیہ و آلہٖ و سلم نے سرِ چاہ نزول فرمایا تو وہاں یہ واقعہ پیش آیا کہ حضرت عمر رضی اللہ تعالیٰ عنہ کے اجیر جہجاہ غِفَاری اور ابنِ اُبی کے حلیف سنان بن دبرجُہَنِی کے درمیان جنگ ہو گئی، جہجاہ نے مہاجرین کو اور سنان نے انصار کو پکار ا، اس وقت ابنِ اُبَی منافق نے حضور سیّدِ عالَم صلی اللہ علیہ و آلہٖ و سلم کی شان میں بہت گستاخانہ اور بے ہودہ باتیں بکیں اور یہ کہا کہ مدینہ طیّبہ پہنچ کر ہم میں سے عزّت والے ذلیلوں کو نکال دیں گے اور اپنی قوم سے کہنے لگا کہ اگر تم انہیں اپنا جھوٹا کھانا نہ دو تو یہ تمہاری گردنوں پر سوار نہ ہوں، اب ان پر کچھ خرچ نہ کرو تاکہ یہ مدینہ سے بھاگ جائیں، اس کی یہ ناشائستہ گفتگو سن کر زید بن ارقم کو تاب نہ رہی انہوں نے اس سے فرمایا کہ خدا کی قَسم تو ہی ذلیل ہے اپنی قوم میں بغض ڈالنے والا اور سیّدِ عالَم صلی اللہ علیہ و آلہٖ و سلم کے سرِ مبارک پر معراج کا تاج ہے، حضرت رحمٰن نے انہیں عزّت و قوّت دی ہے، ابنِ اُبَی کہنے لگا چپ میں تو ہنسی سے کہہ رہا تھا، زید بن ارقم نے یہ خبر حضور صلی اللہ علیہ و آلہٖ و سلم کی خدمت میں پہنچائی، حضرت عمر رضی اللہ تعالیٰ عنہ نے ابنِ اُبَی کے قتل کی اجازت چاہی، سیّدِ عالَم صلی اللہ علیہ و آلہٖ و سلم نے منع فرمایا اور ارشاد کیا کہ لوگ کہیں گے کہ محمّد (صلی اللہ علیہ و آلہٖ و سلم) اپنے اصحاب کو قتل کرتے ہیں، حضور ِ انور صلی اللہ علیہ و آلہٖ و سلم نے ابنِ اُبَی سے دریافت فرمایا کہ تو نے یہ باتیں کہیں تھیں؟ وہ مُکَر گیا اور قَسم کھا گیا کہ میں نے کچھ بھی نہیں کہا، اس کے ساتھی جو مجلس شریف میں حاضر تھے، وہ عرض کرنے لگے کہ ابنِ اُبَی بوڑھا بڑا شخص ہے، یہ جو کہتا ہے ٹھیک ہی کہتا ہے، زید بن ارقم کو شاید دھوکا ہوا اور بات یاد نہ رہی ہو، پھر جب اوپر کی آیتیں نازل ہوئیں اور ابنِ اُبَی کا جھوٹ ظاہر ہو گیا توا س سے کہا گیا کہ جا سیّدِ عالَم صلی اللہ علیہ و آلہٖ و سلم سے درخواست کر، حضور تیرے لئے اللہ تعالیٰ سے معافی چاہیں، تو گردن پھیری اور کہنے لگا کہ تم نے کہا، ایمان لا تو میں ایمان لے آیا، تم نے کہا، زکوٰۃ دے تو میں نے زکوٰۃ دی، اب یہی باقی رہ گیا ہے کہ محمّد مصطفیٰ صلی اللہ علیہ و آلہٖ و سلم کو سجدہ کروں، اس پر یہ آیتِ کریمہ نازل ہوئی۔
(۶) ان پر ایک سا ہے تم ان کی معافی چاہو یا نہ چاہو، اللہ انہیں ہر گز نہ بخشے گا (ف ۱۶) بیشک اللہ فاسقوں کو راہ نہیں دیتا۔
۱۶ اس لئے کہ وہ نفاق میں راسخ اور پختہ ہو چکے ہیں۔
(۷) وہی ہیں جو کہتے ہیں کہ ان پر خرچ نہ کرو جو رسول اللہ کے پاس ہیں یہاں تک کہ پریشان ہو جائیں، اور اللہ ہی کے لیے ہیں آسمانوں اور زمین کے خزانے (ف ۱۷) مگر منافقوں کو سمجھ نہیں۔
۱۷ وہی سب کا رازق ہے۔
(۸) کہتے ہیں ہم مدینہ پھر کر گئے (ف ۱۸) تو ضرور جو بڑی عزت والا ہے وہ اس میں سے نکال دے گا اسے جو نہایت ذلت والا ہے (ف ۱۹) اور عزت تو اللہ اور اس کے رسول اور مسلمانوں ہی کے لیے ہے مگر منافقوں کو خبر نہیں (ف ۲۰)
۱۸ اس غزوہ سے لوٹ کر۔
۱۹ منافقین نے اپنے کو عزّت والا کہا اور مومنین کو ذلّت والا، اللہ تعالیٰ فرماتا ہے۔
۲۰ اس آیت کے نازل ہونے کے چند ہی روز بعد ابنِ اُبَی منافق اپنے نفاق کی حالت پر مر گیا۔
(۹) اے ایمان والو تمہارے مال نہ تمہاری اولاد کوئی چیز تمہیں اللہ کے ذکر سے غافل نہ کرے (ف ۲۱) اور جو ایسا کرے (ف ۲۲) تو وہی لوگ نقصان میں ہیں (ف ۲۳)
۲۱ پنجگانہ نمازوں سے یا قرآن شریف سے۔
۲۲ کہ دنیا میں مشغول ہو کر دِین کو فراموش کر دے اور مال کی محبّت میں اپنے حال کی پروا نہ کرے اور اولاد کی خوشی کے لئے راحتِ آخرت سے غافل رہے۔
۲۳ کہ انہوں نے دنیائے فانی کے پیچھے دارِ آخرت کی باقی رہنے والی نعمتوں کی پرواہ نہ کی۔
(۱۰) اور ہمارے دیے میں سے کچھ ہماری راہ میں خرچ کرو (ف ۲۴) قبل اس کے کہ تم میں کسی کو موت آئے پھر کہنے لگے، اے میرے رب تو نے مجھے تھوڑی مدت تک کیوں مہلت نہ دی کہ میں صدقہ دیتا اور نیکوں میں ہوتا۔
۲۴ یعنی جو صدقات واجب ہیں وہ ادا کرو۔
(۱۱) اور ہرگز اللہ کسی جان کو مہلت نہ دے گا جب اس کا وعدہ آ جائے (ف ۲۵) اور اللہ کو تمہارے کاموں کی خبر ہے۔
۲۵ جو لوحِ محفوظ میں مکتوب ہے۔
